rain

هههههه

شي مضحك مبكي الصراحه,

بالكويت نستانس لمه يطق المطر , لكنه يعفس علينا الشوارع ويزيد الحوادث

مو معقوله كل ما طق مطر , سكرت الشوارع والمدارس وصارت ربكه بالشوارع الرئيسيه واختربت الاشارات !

اليوم الصبح كنت بودي اخواني للمدرسه , بس لمه وصلت لمنطقه الدعيه اكتشفت ان احد شوارعها الرئيسيه غرقان بالماي !
زين ان عندي جيب هععععععع , قدرت اوصل للمدرسه , لكن ما كان في دوام

اعتقد حتى باجي المناطق اغرقت , ومحد من طلاب المدارس داوم



يا حكومه لازم تعدلون البنيه التحتيه التعبانه عندنا !!!
شي مخجل الصراحه

wireless router

الاسبوع اللي طاف شريت روتر وايرليس نوع linksys

كان اختيار موفق , لانه اشتغل بسهوله بلينكس وبدون اي تعقيدات
واستخدمت
static ip's
لان ما عرفت استخدم dhcp

عالعموم , الحين صارت الانترنت متوفر ٢٤ ساعه بكل انحاء البيت :)

rams

امس شريت رامات ١ غيغا,

سرعتهم ٤٠٠ ميغا هرتز


استبدلتهم بالرامات القديمه اللي عندي ٥١٢ ,, سرعه ٤٣٤
دورت بالسوق على نفس موديل الرامات القديمه , بس ما لقيت

علشان جذيه شريت الرامات اليديده

بس ما شاء الله من ركبتهم اختلف اداء الجهاز بدرجه عاليه جدا
حتى طفيت السواب ميموري ,


الحلو بالرامات الحين , ان اسعارهم رخصت ومساحتهم زادت :)
حتى رامات اللابتوب

شبابيك

اليوم وانا قاعد اتغدى , فريت الموجه على تلفزيون الكويت , شفتهم حاطين برنامج شبابيك
للاسف برنامج شبابيك كان برنامج شبابي اسبوعي يحطونه المغرب , وكان يقدمه مذيع شاب صغير نسيت اسمه , المهم كان البرامج لاباس فيه ويعرض شغلات حلوه ,

الحين نقلوا موعد بث البرنامج للظهر يوم اليمعه , وقت الغلقه !
وحطوا المذيع بدر الدلح ومشاعل الزنكوي وصار برنامج حواري يستقبل ضيوف ويتكلمون عن المواضيع المطروحه ,
كأن ناقصتنا برامج حواريه


تلفزيون الكويت اصلا يفتقر لبرامج شبابيه جيده , ولمه انوجد برنامج ,,,, قاموا بتغييره ١٨٠ درجه !!

سحقا !

new ibook

شركة ابل طورت من خط انتاج لابتوبات اي بوك و ميني ماك

لابتوبات الايبوك ١٢ انش , زادوا الرام الى ٥١٢ وطوروا الوايرلس الى سرعه ٥٤ ميغا بايت وضافوا بلوتوث وبعد كرت شاشه محسن


وبنفس الوقت ضافوا نظام تشغيل النمر , مع برامج جديده
كل هذا بنفس السعر القديم !!

خطوه حلوه من ابل , خصوصا ان وايد ناس كانوا يشتكون من ان المواصفات القديمه كانت تفتقر للرام , كان الرام ٢٥٦ بس


المحزن بالخبر اني شريت لابتوبي ماك من شهرين , بالمواصفات القديمه هههعع

امس وصل اشتراكي الدي اس ال , سويت اشتراكي عند فاست تلكو لاني مجربهم من قبل وادري ان خدمتهم محترمه

ب ٣ ايام وصل الدي اس ال واشتغل

واللي فرحني اكثر , اشتغل مودم الدي اس ال على لينكس بسهوله
المودم نوعه يو اس بي , وكنت متوقع تحوشني مشاكل لانه مو اثرنيت , لكن الحمدلله اشتغل بسهوله وبدون اي استفسارات


--------

اليوم شفت بالنت صوره اصغر مشغل اغاني ام بي ثري !

الصراحه ما توقعت يكون بهذا الحجم

browser

اليوم تفاجات من موقع بنك الكويت الوطني

لمه حاولت ادش علي خدمه الوطني اون لاين ، عطاني مسج يقول فيه لازم تستخدم متصفح انترنت اكسبلورير فقط !

المفروض يدعمون متصفحات الانترنت الاخرى ،،، فاير فوكس مثلا ماخذ حصه كبيره من سوقها


لازم يهتمون بباقي العملاء علي مختلف انظمتهم